文／羅瑞霞　國小本土語言客語教師、竹北客人，這下戴竹北

腔調：海陸腔

東勢劉屋掛紙个特別，早在幾下年前斯有聽過，該下感覺當有意思，想講哪日有機會乜來去看一擺，今年正月，東勢朋友又在臉書貼出劉屋掛紙个影片，亻厓看著有點仔心肝痎痎，該朋友又講一句︰你做得去看啊！佢兜掛紙个日仔固定在「春分」這日。查一下「春分」這日堵好禮拜日，亻厓想想仔，好！這擺斯下去看，雖然毋識自家駛車仔去過(遊覽去過)，毋過想想，做田野調查毋係新手，還係決定去，前一日，特別問東勢朋友地點在哪？幾多點開始？好得有問，佢講朝晨七點半在「東勢土牛文化館」集合。

禮拜日，亻厓五點䟘床，準備一下，五點半出發，該下天吂光，一路上無麼个車仔，去到東勢土牛文化館，哇！面頭前搭等布篷，幾下臺貨車停等，車頂放町當多个祭品，工作人員乜當多，亻厓遽遽尋一個大哥問講：請問你兜愛去掛紙咧係無？亻厓做得跈等去翕相無？該大哥講：做得啊！毋過車仔做盡坐淰咧！過無幾久，亻厓看一個細阿哥仔企在貨車脣，斯行前去問：細阿哥仔，你兜乜愛去掛紙係無？做得搭你个車仔無？亻厓在新竹下來，䟓工下來記錄你兜特別个掛紙禮俗，該個細阿哥仔應講，亻厓乜係分人載个，講啊煞，一個大姐行等過來，細啊哥仔問該大姐講，這個細阿姐愛搭車仔，做得無？該大姐算啊算，做得！上車！在車頂，亻厓正知駛車个大姐姓潘，厥老公坐在脣頭安到劉祥三，該個細阿哥仔係厥姪仔，劉家第二十三世，在車頂劉祥三先生當恬，無麼个講話，顛倒係該位大姐，聽佢講話，還過看佢做事煞手斯知，係一個又慶又當會理家个餔娘，佢還講，盡難得个機會，三十二年正輪到一擺(根據劉先生个姪仔解釋，房族大，子孫開枝散葉多，正識係三十二年正輪著，佢兜這房就係，係講子孫無恁旺个房族，斯毋使恁久輪著，會較輒斯輪著，潘大姐對等厥姪仔講︰「亻厓兜已經無可能再過等三十二年咧，你兜還做得啊！」

從土牛文化館駛車到掛紙个位所，大約十過分鐘斯到，車仔到一個大坪停下來，開始扌帣搬祭品，亻厓跈等人員行細山路行往上，看著一門當老个風水，四圍草伐當淨，看起來當好當靚，原來這門風水个位所安到：「美人照鏡穴」。（待續）

華語：

東勢土牛劉家掃墓訪談記錄

東勢劉家掃墓的特別，早在幾年前就有聽過，那時候覺得很有意思，想說哪天有機會也要去看一次，今年一月，東勢的朋友又在臉書貼出劉家掃墓的影片，我看到心裡覺得癢癢得，那位朋友又說了一句︰你可以去看啊！他們掃墓的日期固定在「春分」這一天。查一下「春分」這一天剛好星期日，我想了想，好吧！這次就下去看，雖然從未自己開車去過(遊覽去過)，不過想想，做田野調查也不是新手，還是決定去，出發前一天，特別問東勢朋友地點在哪裡？幾點開始？幸好有問，他說早上七點半在「東勢土牛文化館」集合。

星期日，我五點起床，準備一下，五點半出發，那時候天色未亮，一路上沒什麼車子，到了東勢土牛文化館，哇！前面搭著布篷，有幾臺貨車停著，車上放著很多的祭品，工作人員也很多，我趕緊找一個大哥問說：請問你們要去掃墓了是嗎？我可以跟著去拍照嗎？那位大哥說：可以啊！不過車子都已經坐滿了哦！沒多久，我看一個年輕人站在貨車旁，就走上前去問：這位帥哥，你們也要去掃墓是嗎？可以搭你的便車嗎？我從新竹專程下來記錄你們很特別的掃墓習俗，那位年輕人回說，我也是搭別人的車，剛說完，一位大姐走過來，年輕人問那位大姐說，這位小姐要搭便車，可以嗎？那位大姐算啊算，可以！上車！

在車上，我才知道開車的大姐姓潘，他老公坐在旁邊叫做劉祥三，那個年輕人是他的姪子，劉家第二十三世，在車上劉祥三先生很安靜，沒有說話，反而是那位大姐，聽她說話，還有看她做事俐落就知道，是一個又能幹又懂得持家的老婆，她還說，很難得的機會，三十二年才輪到一次(根據劉先生的姪子解釋，家族大，子孫開枝散葉多，真得是三十二年才輪得到，他們這一房就是。如果說子孫沒那麼多的一房，就不會這麼久才輪到，會比較快就輪到)，潘大姐對著他的姪子說︰「我們已經不可能再有個三十二年了，你們還有啊！」

從土牛文化館開車到掃墓的地方，大約十幾分鐘就到，車子開到一個平坦的草坪停下來，開始忙著搬祭品，我跟著人員走小山路往上走，遠遠看到一座很古老的墓碑，周圍草除得很乾淨，整座看起來很好很漂亮，原來這門風水就是人稱的：「美人照鏡穴」。（待續）

這篇文章 【寫客文】東勢土牛劉屋掛紙訪談 最早出現於 客新聞 HakkaNews。