文／范雪霞　國小先生退休、苗栗客人、現下核苗栗

腔調：四縣腔

熱天个味緒係一垤一垤汗流脈絡佇毋著个日頭影仔鬥起來个，也係食冰个回憶在這裡背留等清涼个味緒。逐擺想著熱𤐰𤐰个熱天一隻手擎等遮仔一隻手擎枝仔冰緊行緊食，該種幸福个感覺，發夢就會笑。還有，坐在冰店電扇脣項，定定仔食擦冰，實在係還細時節盡靚个回憶。講起來𠊎摎讀書伴這生人若係無（白食）个味緒，就無半息生趣。

時代進步，細人仔對愛擇麼个冰，做得講隨在你擇到暢。從盡老時个芋仔冰、蕃豆冰，到外國進口个軟冰；從一枝五个銀个枝仔冰，到一份歸百个銀个火炒軟冰，集合了傳統个味緒摎已厲害个食品技術，現代人盡有食祿。

記得𠊎讀小學時節，庄項五穀廟坪脣个一間冰店，店肚項枝仔冰摎擦冰盡有名。像蕃檨冰、紅豆冰，一枝正五个銀，四菓冰一碗十个銀，該料仔有木瓜絲、鹹酸甜、蕃豆、楊桃乾、愛玉、米篩目、粉圓、仙草，便宜又值食。

該央時阿爸係小公務員，屋下細人仔多，𠊎難得有私胲（私伽錢），一日三餐做得食飽，就無恁該，故所該時節做得食到一根枝仔冰抑係一碗四菓冰，正經係大大个享受。一口冰含在嘴肚，總愛舐到暢，正甘願食忒。

這間冰店，用个係純糖水，毋係像現代店仔用糖精摎麼个化學東西，故所一到熱天，冰店面前總係排歸列相爭買冰个人，頭家兩公婆逐日當無閒，故所分人客自家撿錢自家找錢。這種方式盡好，毋過也有人恬恬仔食毋放錢。傳到頭家該片，頭家將就摎店面改做「白食冰店」愛撿毋撿錢，隨在自家本心，品質無影響。佢講這係傳統客家人篤實个做法。聽著實在已感心!

時間當遽過，現下頭家退休無做了，這一代細人仔無法度去想該間店仔，𠊎毋識「白食」過，但係心肝肚囥等白食店仔盡多童年个回憶，逐年熱天一到，就會想著白食个味緒，裝等淰淰對人信任个人情味！

華語：

白吃的味道

夏天的味道是一塊一塊汗流浹背受不了的日照影子拼湊起來的，也是吃冰的回憶在這裡面留著清涼的味道。每次想到熱呼呼的夏天一隻手撐著傘一隻手拿著冰棒邊走邊吃，那種幸福的感覺，做夢都會笑。還有，坐在冰店電扇旁邊，慢慢的吃剉冰，實在是小時候最美的回憶。說起來我跟同學這輩子如果沒有（白吃）的味道，就沒什麼樂趣。

時代進步，小孩子對要選什麼冰吃，可以說隨便你選到高興。從最古早味的芋頭冰、花生冰，到外國進口的冰淇淋；從一枝五塊錢的冰棒，到一份上百元的火炒冰淇淋，總匯了傳統味道和非常厲害的食品技術，現代人最有了。

記得我唸讀小學時候，村裡五穀廟旁一間冰店，店裡冰棒和剉冰最有名。像芒果冰、紅豆冰，一枝才五塊錢，四菓冰一碗十塊錢，那餡料有木瓜絲、蜜餞、花生、楊桃乾、愛玉、米苔目、粉圓、仙草，便宜又實惠。

那時候爸爸是小公務員，家裡小孩子多，我難得有私房錢（積蓄），一天三餐可以吃飽，就沒那麼容易，所以那時候可以吃到一根冰棒或者是一碗四菓冰，真的是莫大的享受。一口冰含在嘴裡，總要舔到過癮，才捨得吃完。

這家冰店，用的是純糖水，不是像現代店裡用糖精和什麼化學東西，所以一到夏天，冰店前面總是排整列搶著買冰的人，老闆兩夫妻每天非常忙，所以讓顧客自己付錢自己找錢。這種方式最好。可是，也有人默默的吃完不付錢。傳到老闆那邊，老闆乾脆就把店名改成（白吃冰店）要付錢不付錢，憑自己的良心，不影響品質。他說這是傳統客家人敦厚的做法。聽到實在好感動！

時間過得很快，現在老闆退休沒賣冰，這一代孩子無法想像那間店，我不曾（白吃）過，但是心裡藏著白吃店最多童年的回憶，每年一到夏天，就會想著白吃的味道，裝著滿滿對人信任的人情味。

這篇文章 【寫客文】白食个味緒 最早出現於 客新聞 HakkaNews。