文／張美煜　電台節目主持人、屏東縣福佬庄个關西裔客人、這下戴新北市新店區

腔調：海陸腔、四縣腔

這恁多年，食客家料理變成一種時行，除了儕儕都知个「炒肉」(餐廳安到「客家小炒」)，還有一項「塔香茄子」(茄仔摎七層塔共下炒；七層塔，福佬話安到「九層塔」)乜係當多人好食个。「茄仔」四縣客語，安到「吊菜仔」，海陸客語本本講「茄仔」(讀做kio-er)。四縣客語仰會摎茄仔喊做「吊菜仔」呢?其實摎文化語言學有相當關係。

一般人安名，定著係向好聽个、吉祥个方面考慮，盡量閃開毋好个、毋雅个名，這就係人講个「避諱」「雅名化」个原則。「茄仔」改做「吊菜仔」就係一隻例仔。「茄」字个客語音讀做kioˇ，堵好摎瘸手瘸腳个「瘸」字共音，逐擺講着茄仔，總係kioˇ來kioˇ去，分人歸身虐削毋舒爽，除了衰鳥仔，有麼人愛瘸手跛腳呢？所以為着「避諱」求吉利，就摎「茄仔」改做「吊菜仔」了，表示佢係「吊在植株上个菜」，毋係食厥葉仔、梗、抑係根个菜。

還有一種生命力當強、當營養个青菜，食齋人認為係「葷菜」之一个「韭菜」(摎蔥蒜齊名)，四縣客語安到「快菜」，海陸客語本本講「韭菜」。做麼个喊做「快菜」呢？這係反面思考來求好个安名方式。「韭」字讀giuˇ，摎「久」字共音，所有耕種人，儕儕都希望種个作物(包括青菜)生越遽越好，早兜有好摘來食、有多多好拿去賣錢，麼人愛「久久」正有收成呢？係做得像西洋童話底肚个〈傑克魔豆〉恁樣，種落去一暗晡就大嫲嫲了，毋知有幾好呢！敢毋係？

另外，賣肉个生理人摎豬仔、牛仔个舌嫲喊做「脷頭」(豬脷頭、牛脷頭)，乜共樣係為着求吉利个原因；因為客語个「舌」字摎「蝕本」个「蝕」字共音，全讀作sad/shad。俗話講「㓾頭生理有人做，蝕本生理無人做」，做生理本來就係求賺錢，係有「一本萬利」甚至毋使本錢个好空生理，大家半夜乜相賽去做了，就算冒等分人㓾頭个危險乜會搶等去做，因為危險性越高个生理，利潤乜越高；無錢賺甚至會「蝕本」个了錢生理，有麼儕會想愛做呢，又毋係腦殼壞忒个戇仔了，所以生理人當然愛摎「舌嫲」改作「脷頭」了。

華語：

客家菜名，有趣又有文化

最近幾年，吃客家料理變成一種流行，除了人人都知道的「炒肉」(餐廳叫「客家小炒」)，還有一樣「塔香茄子」(茄子跟「九層塔」(客語叫”七層塔”)一起炒；七層塔，閩南語叫「九層塔」)也是很當多人愛吃的。「茄子」，四縣腔客語叫「吊菜仔」，海陸客語仍然說「茄仔(茄子)」(讀作kio-er)。四縣腔客語為何會將茄子說成「吊菜仔」呢?其實跟文化語言學有相當關係。

一般人命名，總是往好聽的、吉祥的方面考慮，盡量避開不好的、不雅的名稱，這就所謂的「避諱」「雅名化」的原則。「茄仔」改稱「吊菜仔」就是一個例子。「茄」字的客語音讀做kioˇ，正好與瘸手瘸腳的「瘸」字同音，每次講到茄仔，總係kioˇ來kioˇ去(瘸來瘸去)，給人渾身不自在不舒服的感覺，除了倒楣鬼，有誰喜歡瘸手跛腳呢？所以為了「避諱」求吉利，就將「茄仔」改做「吊菜仔」了，表示它是「吊掛在植株上的食材」，不是吃它葉子、莖梗、或根部的菜。

還有一種生命力極強、十分營養的青菜，吃素者稱作「葷菜」之一的「韭菜」(與蔥蒜並列)，四縣腔客語稱作「快菜」，海陸腔客語依然稱作「韭菜」。為什麼稱「快菜」呢？這是逆向(反向)思考來求好的命名方式。「韭」字客語讀giuˇ，摎「久」字共音；所有種田人，人人都希望種下的作物(包括青菜)長得生越快越好，可以早日收成採來吃、或者能有更多的拿去賣錢，有誰願意「久久」才有收成呢？若能像西洋童話裡那個〈傑克魔豆〉一樣，種下去一夜之間就長大了，該多麼好，難道不是嗎？

另外，賣肉的生意人將豬、牛的舌頭稱作「脷頭」(豬脷頭、牛脷頭)，也是同樣為了圖個吉利罷了；因為客語「舌」字與「蝕本(折本虧錢)」的「蝕」字同音，都讀作sad/shad。俗話說「殺頭生意有人做，賠錢生意無人做」，做生意本來就是將本求利的事，若有「一本萬利」甚至不需本錢的好生意，大家三更半夜也必定爭先恐後地去做了，就算冒著被殺頭的危險也會搶著去做，因為風險越高的生意，利潤也越高；沒啥賺頭甚至會虧本賠錢的生意，有誰會願意做呢，又不是腦袋壞掉的大傻瓜，所以生意人當然要將「舌頭」改稱「脷頭」了。

這篇文章 客家菜名–生趣合gag有文化    最早出現於 客新聞 HakkaNews。